Opna arbeidsfellesskapet FUS på Leikanger
Ordførar Arnstein Menes stod for snorklyppinga då Sogndal kommune og Sogn Næring opna arbeidsfellesskapet FUS på Leikanger.
“Det skal etablerast ein samanhengande struktur for utviklingsmiljø i heile den nye kommunen, med utgangspunkt i FUS på Campus, Skaparstova i Balestrand, Vitensenteret på Kaupanger og Leikanger Næringshage.”
På Campus i Sogndal har Sogn Næring drive FUS på oppdrag for Sogndal kommune sidan 2017. Her er gründerar, nyetablerte og meir etablerte føretak samla i eitt arbeidsfellesskap. I Leikanger har næringshagen hatt aktivitet i Bankbygget i over 20 år.
-Nyopninga vert ei vidareføring av dette arbeidet, seier Torgeir Skålid i Sogn Næring. Sjølv om vi no opnar fysisk, er det no jobben startar med å gje det innhald og meining.
Heimflyttar
For Emilie Pellegrino som flytte heim att til Leikanger for fem år sidan, og som no fyller rolla som hotellsjef på Leikanger Fjordhotel, meiner FUS-tilbodet er viktig.
- Eg håpar at FUS på Leikanger bidreg til at fleire flyttar heim, og at staden vert meir attraktiv.
Kvilar ikkje
For oss i Sogn Næring stoppar ikkje arbeidet med utviklingsstrukturen på Leikanger. Arbeidet med FUS på Kaupanger knytt til ViteMeir er godt i gong, i tillegg jobbar vi tett med næringsliv og kommune for å skapa meir liv i rådhuset i Balestrand.
-Måten me jobbar på har endra seg, og behovet for fleksible arbeidsplassar veks. Det kan vera såkalla «nummer 2-jobbar» der den eine har fått fysisk jobb på Leikanger, og der den andre har moglegheit til å ta med seg sin jobb og jobba frå heimekontor. Eller der tilsette i kommunen har behov for å ha arbeidsdagar andre plassar enn på sin vanlege arbeidsstad, seier Skålid.
Samskaping
Ordførar Arnstein Menes avslutta opninga med offisiell snorklipping.
-Ein av verdiane til kommunen er «samskaping», det vil sei at me skal skapa vekst og attraktivitet saman med næringslivet. FUS vil vera viktig for å nå visjonen vår – livskvalitet og utviklingskraft i Sogn.
Vil du vita meir om FUS, eller treng du eller nokon du kjenner ein fleksibel arbeidsstad? Følg med når vi utviklar denne nettstaden eller kontakt oss for meir informasjon.
