Bli mentor!
Korleis kan du bidra til inkludering på arbeidsplassen din?
Jobben gjev mange av oss ein stad å høyre til, arbeidskollegaer og ei inntekt å leve av. Du kan glede deg til helg og til feriane, du kan leggje deg trøytt og ha noko å stå opp til. Du lærer stadig noko nytt, du høyrer til ein stad.
For mange som kjem flyttande til Noreg og Sogn, er det å vere i arbeid den beste måte å lære norsk på å bli ein del av lokalsamfunnet. Nokon treng litt ekstra støtte og opplæring.
Kva?
Me tilbyr opplæring til dei som tek i mot innvandrarar på arbeidsplassane. I programmet set me fokus på tema som rettleiing og kommunikasjon, kulturell variasjon, psykisk helse og arbeid og konflikthandtering. Deltakarane vil vere med å gje programmet form. Ved å melde på tilsette bidreg verksemda i Sogn regionråd sitt arbeid for integrering og inkludering.
Kven?
Dette er for verksemder som tilbyr arbeidstrening eller har eit stort rekrutteringsbehov. Mentor er ein tilsett som ofte får ansvar for å ta i mot nytilsette og deltakarar på arbeids- og språktrening. Dei er tett på og er ein kjentmann i høve arbeidsoppgåver og livet elles på arbeidsplassen. Dei gjev opplæring, oppfølging og støtte og er motivert for å lære meir om det å vere mentor.
Korleis?
Mentorprogrammet består av fem samlingar i perioden januar til juni 2022. Verksemda gjev dei tilsette fri for å delta og får tilbake kompetanseheving innanfor viktige fagområde.
Samlingane vert haldne i Sogndal og er gratis. Vestland fylkeskommune og Sogn regionråd finansierer programmet. Arbeidsplassar som må leige inn vikar kan få noko kompensasjon for deltakinga.
