Treng dine tilsette kurs eller opplæring? Det kan du søke støtte til no
Vestland fylkeskommune lyser ut midlar til bedriftsintern opplæring (BIO-midlar), med søknadsfrist 10. april.
Støtta skal gå til kompetanseheving for tilsette, slik at bedrifta skal klare nødvendig omstilling. Det kan vera i form av opplæringstiltak som fremmer grøn omstilling i bedrifta, eller opplæringstiltak som fører til digitalisering av bedrifta.
Les heile utlysinga og søk her!
Du kan få dekka opp til 30 000 kroner til opplæring per tilsett, og gjennomføre opplæringa innan ei tidsramme på 26 veker. Opplæringa de gjennomfører må vera ekstraordinær, altså i samband med at de innfører noko nytt i verksemda, eller ei eingongsinvestering der de overfører kompetanse mellom tilsette.
Bedrifter kan søke støtte til opplæringstiltak for eigne tilsette. Det er ein fordel om fleire bedrifter går saman om søknad og undervisningsopplegg, men då må ei bedrift stå som ansvarleg søkar.
Døme på opplæringstiltak du kan søke kompetanseheving til, er opplæring som gjer at de kan jobbe med ny teknologi, som ei ny produksjonslinje eller digitalisering. Det kan vera opplæring som gjer at de når nye marknader, eller kompetanse de treng for å starte utvikling av nye produkt eller tenester.
Utviklingsprosjekt i landbruket?
Vestland fylkeskommune har også to ordningar retta mot landbruket ute no, med søknadsfrist 15. april.
Tilskot til regionale tilretteleggingstiltakt i landbruket er ei ordning som verksemda di kan søke på dersom tiltaket du søker om har som mål å fremje fellesgoder knytt til næringsutvikling. Det kan til dømes vere utviklingsarbeid, klyngesamarbeid, kompetansehevingstiltak, metodeutvikling og tilrettelegging for næringsutvikling i landbruket.
Den andre ordninga er tilskot til rekruttering og kompetanse i landbruket. Også her må tiltaket vere av regional karakter for å få støtte, og komme fleire bedrifter til gode.
Kommunar, organisasjonar og forskings- og utviklingsinstitusjonar registrert i Enhetsregisteret kan søke på ordningane.
Her finn du ei oversikt over aktørane du kan søke støtte hos, uavhengig av bransje, eller ta kontakt med oss her for ein prat.