Kva blir ein ettermiddag, tre sidergardar og 20 fruktbønder frå heile Sogn? Ein veldig kortreist studietur.

Vi kan læra mykje av naboane våre. Rundt i Sogn er det fleire siderprodusentar som byrjar å få erfaring som andre kan nyte godt av. Ein av dei er Mette Marie Heiberg, som driv Amble gård. Det var fyrste stopp på det super-lokale studieturen Sogn Næring og Sogn frukt- og siderlaug inviterte til. Vi fekk vere med inn i produksjonslokala, sjå heile produksjonslinja frå press til etikett, den gamle møkakjellaren som tek ny form og gardsbutikken som er pynta til jul.

– I Sogn frukt- og siderlaug er det utruleg låg terskel for å utveksle erfaring og stille kvarandre spørsmål. **Det er godt samhald og delingskultur, og det meiner vi bidreg til å bygge alle opp**, fortalte Mette Marie Heiberg til dei besøkande.

Vidare gjekk turen til Fimreite og Odelsgut. Der tok Alexander Haug med gjestene inn i det renoverte naustet. Der fekk dei innblikk i korleis odelsguten som aldri skulle bli far eller bonde vart fruktbonde og medaljevinnande siderprodusent - saman med sambuar Cecilia og deira tre gutar. Vidare fekk deltakarane innblikk i kva turistane som besøker dei er interesserte i, og kor stor rolle sidersmakingar og besøk på garden spelar i å bygge opp merkevara deira.

– For det første har vi jo ein fantastisk historie rett ute i fjorden her, med slaget på Fimreite. Tenk at det skjedde rett her ute. Vi merkar også at jungeltelegrafen er heilt uvurderleg for at folk skal få vite at vi og Odelsgut-sider finst. Det er ulovleg å reklamere for alkohol. Då betyr det mykje at folk har vore her, hatt ei god oppleving, og fortel det til andre.

Ølmheim siderhage var siste stoppestad for turen. Vi fekk vere med inn i flett nytt produksjonslokale. Vi fekk sjå kva investeringar Endre Kleiveland og Sigrid Ølmheim har gjort, og kva som er likt og ulikt frå dei andre produsentane. Vi runda av i finstova på garden, med smaking av både sider, alkoholfritt og pizza-servering, som er produktet Ølmheim Siderhage leverer til gjester på smaking. Endre Kleiveland er styreleiar i Sogn frukt- og siderlaug, og runda av kvelden med nokre velvalgte ord:

– Ikkje tenk at de må hoppe i det med ein gong. Det går an å kjøpe litt presseple frå Sogn frukt- og grønt, og leige presskapasitet hos nokre av oss som allereie har investert i utstyret. Sett nokre hundre liter for å lære deg korleis du lagar sider. Dette går an å ta steg for steg, og ikkje minst er det moro! Sogn frukt- og siderlaug ønskjer nye medlemmer velkomne, for vi har trua på at ein større bukett tilbod i regionen vår gagnar oss alle.

Den super-lokale studieturen vart arrangert med god hjelp av landbruksrådgivarane frå alle Sognakommunane, med støtte frå Vestland fylkeskommune og god innsats frå medlemmene i Sogn frukt- og siderlaug. Vi gler oss å sjå fruktene (!) arbeidet ber.