Innovasjons- og karrieredagen for 10.trinn i Sogn
Førre veke var det Innovasjons- og karrieredagar for 10. trinn på Campus Sogndal. Rundt 260 elevar frå heile Sogn tok turen! Dette er eit samarbeid mellom Sogn Næring, HVL Skape, Ungt Entreprenørskap Vestland og System for styrka læring.
På den eine stasjonen disse dagane blei dei unge tatt gjennom korleis dei skal lage ein pitch og fekk moglegheita til å prøve seg på å pitche ei løysing på reelle samfunnsutfordringar. Motiverte og kreative elevar med mange gode idear! Fleire kom blant anna på eigne problemstillingar. Ei gruppe med elevar frå Kaupanger kom på ei løysing dei kalla «Skogsmagi». Dei fortel at denne ideen kom frå ei utfordring dei sjølve har sett heime på Kaupanger. Her er det mange som har hekk, og hjorten et opp hekken. Dette vil dei få slutt på, og kom dermed på å utvikle eit middel som gjer at hjorten held seg unna.
Ei gruppe frå Aurlandselevane har tenkt i ei heilt anna retning med fokus på FN sine berekraftsmål. Dei har kalla ideen «Stopp Temu». Dei ønskjer å skape medvit rundt berekraft og at folk skal slutte å handle frå Temu, sidan dei bryt mange reglar når det gjeld berekraft. For å gjere dette tenkte dei å bruke sosiale medium. Ei anna gruppe med elevar frå Lærdal kom på ein ide dei kalla «Duo-Plug, Inc.», ein ny måte å lade og høyre på musikk frå mobilen samstundes.
På ein annan stasjonfekk elevane høyre gründerhistorier der studentbedrifter som Nærmenå og Vestboardgames, og andre etablerte bedrifter som Rekkje stiutvikling, presenterte seg og si gründerreise. Studentassistentane frå HVL Skape, Heine Urnes og Astrid Mortensen, fortalde om moglegheitene 10. klassingar har som studentar ved HVL til å starte opp si eiga bedrift, og Bård og Henrik frå Sogn Næring presenterte kva moglegheiter som finnes vidare. Det blir spennande å sjå – kanskje vi ser att nokre gründarar i framtida!
Den tredje stasjonen gav elevane innsikt i kva tilbod som finst på HVL. Studentambassadørane Andrea og Oskar fortalde om HVL sine utdanningstilbod, dei ulike campusa, studentlivet, og korleis dei valde sine studieretningar. Føremålet her var å vise fram kva HVL kan tilby av høgare utdanning på Vestlandet, og kor viktig det er å bryte nokre barrierar når det gjeld myter om kjønn og studieretning.
Vi håpar dei er inspirerte og tek med seg lærdom frå disse dagane. Eit viktig samarbeid for å bygge opp dei unge som er framtida! Her trengs det nytenking for å utvikle både bedrifter og samfunnet elles.