Bli kjent med to nye ansikt i Sogn Næring

– Utviklingsarbeid er viktig. No har vi rusta opp kapasiteten vår til å ta alle oppdraga vi får frå oppdragsgivarande våre og dei nye prosjekta vi har fått midlar til å jobbe med, seier daglig leiar i Sogn Næring, Line Bjelde.

Frå 1. mars er Henrik Skyttermoen og Sigrid Skjerdal å sjå både på Innovasjonsbygget på Campus og ute for å møta næringsaktørane i regionen. Med mange prosjekt på trappene og mykje å henga fingrane i, har det vore behov for å få fleire å spele på i organisasjonen.

– Me har ein engasjert og positiv gjeng som brenn for utvikling i Sogn hos oss, som eg gler meg til å bli betre kjent med og jobba saman med framover.

Frå Lillehammer til Sogn

Henrik Skyttermoen er fødd og oppvaksen i Lillehammer. Etter fem år i Sogndal er han blitt fullskala sogning, kun dialekta manglar. Naturen, skikøyringa, klatringa og folka han har møtt i bygda er nøkkelen til at han ønskjer å bli. Henrik har bakgrunn frå reiselivet, både innan jobb og studium, og er no på sitt siste år som masterstudent på HVL.

– Eg skriv masteroppgåve om berekraftig destinasjonsuvikling, og er spesielt engasjert i reiseliv, innovasjon og næringsutvikling. Eg synest samfunnsutvikling er utrulig spennande, og at eg kan vere med å forma korleis Sogndal skal bli og hjelpe andre med gode idèar synes eg er kjempekult.

– Eg las at det er kake på innovasjonsbygget kvar tirsdag, så det er nok hovedårsaka til at eg vil jobbe her, seier Henrik.

I Sogn Næring skal Henrik jobba 40 prosent ved sidan av studia på HVL, og er allereie godt i i gang med å bli teamet sin (ufrivillige) IT-hjelpar.

– Eg skal jobbe med vidareutvikling av FUS-lokasjonane våre. Om du har spørsmål om FUS eller ønskjer ein plass i ein av våre bygg, er det berre å ta kontakt!

Henrik Skyttermoen og Sigrid Skjerdal er nye i Sogn Næring.

Ein aurlending i Sogndal

Aurlendingen Sigrid Skjerdal har dei siste åra jobba som leiar for musikkfestivalen Vinjerock, og som journalist i NRK og Sogn Avis. I Sogn Næring skal ho jobba med bedriftsutvikling, prosjekt og arrangement på fulltid.

– Når eg kom tilbake til Sogndal i haust etter nokre år vekke, var det fordi det er ein region der det boblar under overflata. Både i Sogndal og området rundt er det utrulig mange spanande initiativ som rører seg, og det er utrulig kjekt å kunne vera med å utvikla det vidare. Eg likar å vera med å få ting til å skje.

Med sommarjobbar i turistbransjen og gjennom oppveksten på gard, har Sigrid fått med seg eit engasjement for eit berekraftig reiseliv og stoltheit over lokalprodusert mat.

– Det er utrulig spennande å sjå alle prosjekta Sogn Næring er involvert i når det kjem til å driva fram nokre av dei kvalitetane eg sjølv set pris på i regionen. Eg gler meg til å vera med på den jobben. Men først skal eg prøve å få oversikt over alt vi jobbar med, for det er eit solid tempo i denne gjengen.

Stor breidde i staben

Sogn Næring går inn i året med oppdrag frå mellom andre Sogndal kommune, Vik kommune, Sognefjord næringshage, eigargruppa Campus og Sogn Regionråd. I tillegg har vi eigne prosjektmidlar, mellom anna til satsingar på grøn omstilling og kommunikasjon med verkemiddelapparatet.

– Vi skal vera ein pådrivar for at lokaltnæringsliv held fram å vera konkurransedyktige og utnyttar moglegheitene som kjem med det grøne skiftet. I tillegg skal vi sjølvsagt gjera det vi har som grunnmur frå før. Driva bedriftsutvikling, hjelpe oppstartsbedrifter i gang, lage nettverk og drive med kompetanseheving i næringslivet, seier Line Bjelde.

Med fleire oppgåver og mykje på trappene kjem det godt med å ha fleire hender på ballen.

– No har vi ein gjeng med oss som sit på utrulig brei kompetanse. Vi har økonomar, markedsførarar, og kompetanse på merkevarebygging, entreprenørskap, strategi og organisasjonsbygging. I tillegg til kunskapen i gjengen her, har vi gode partnarar rundt oss vi kan spele på.

Nysgjerrig på det som rører seg? Her kan du oppdatere deg på kva vi driv med.