Velkomen til næringspub i Vik!
Saman med Vik Næringssamskipnad inviterer vi til næringspub på Blix! Det blir gratis pizza, spennande historier, og kanskje eit høve til å forme framtida til regionen vår!
Program:
Fedje si vekstreise
Me får høyre den fascinerande historia om nyskapinga på Fedje – ei lita øy i havgapet som har gått frå å vere truga av fråflytting til å oppleve ei ny bølgje av vekst og utvikling. Kommunedirektør i Vik, Siri Fahlvik Pettersen, var ein sentral figur bak oppstarten av Feddie Ocean Distillery og ei samling reiselivsprodukt på den vesle øya. Ho deler si gründerreise og korleis ho har vore med på å forvandle øysamfunnet gjennom bedriftsetablering og reiselivsutvikling. Med bakgrunn som kommunedirektør vil Siri gi eit unikt innblikk i korleis øya har kombinert gründerand med stadutvikling, og byr på både innsikt og humoristiske forteljingar frå livet på Fedje. Dette er ei inspirerande historie om ambisjonar, hardt arbeid, og nye moglegheiter, som gir nytt håp til små lokalsamfunn langs kysten.
Sogn 2040 - Korleis sikre folka og attraktiviteten
Korleis skal me lukkast med å gjere Sogn til ein enda meir attraktiv region, med positiv befolkningsvekst, der næringslivet har tilgang til kompetansen dei har bruk for? Det vil me prata med dykk om! På bestilling frå dei seks kommunane Sognarådet har Sogn Næring arbeida med eit profil og merkevareprosjekt der målet er: Ein felles profil for regionen. Me skal skape ein attraktiv region å etablere seg i, for studentar, gründerar, framtidige bebuarar og verksemder.
Det høyrest kanskje litt kjedeleg ut å drøfte regional utvikling på ein kveld på det lokale vassholet, men vi skal prøve å halda ei kreativ og morsam økt med dykk!
Praktisk
Det blir gratis pizza! Hugs å registrere deg slik at vi veit kor mykkje pizza vi treng! Arrangementet foregår på Blix frå kl 18:00 - 20:00, men du er naturlegvis velkommen til å bli lengre!