Saman med Ciderhuset inviterer Sogn næring til ein kveld med låge skuldrer og boblande idèar kring korleis vi kan nytte sider og anna lokal mat og drikke for å få Sogn inn på reiseruta til turistar.

Det plantast, dyrkast og forskast på kvart eit nes i regionen. På næringspub på Ciderhuset møter du andre som er interesserte i god mat og drikke og korleis vi får det til å bli god næring i regionen.

Gabe Cook, The Ciderologist, ein cider-ekspert på besøk frå England, skal inspirere oss med sitt perspektiv på regionen. Han er i Balestrand som bidragsytar på Ciderakademiet, og brenn for å endre måten vi tenker på og drikk cider.

“Once you scratch underneath the surface you too can see that cider can have all of the elegance and finesse of a fine wine and all of the character and attitude of a craft beer. “

Tuba Ardic og Gard Eitungjerde Høyvik som driv Ciderhuset er kveldens vertskap. Sidan 2022 har dei drive familiebedrifta, der dei inviterer folk frå heile verda inn i drifta gjennom ulike opplegg som work-away og chef in residence-opplegg. Dei brenn for kultur, teater og gode, lokale råvarer, og har alltid nyskapingar på gang både på tallerken og i glaset.

Gard Eitungjerde Høyvik og Tuba Ardic på Ciderhuset i Balestrand er vertskap for næringspuben.

Endre Kleiveland er fruktbonde, siderentusiast og sit i panelet denne kvelden som styreleiar for Sogn frukt- og siderlaug. Det bugnar i fruktmiljøet i Sogn. Sidan stiftinga i 2013 har Sogn frukt- og siderlaug fått mange nye medlemmer, og fleire lokale produkt er på veg ut i marknaden.

Visit Sognefjord er destinasjonsselskapet til kommunane Høyanger, Vik, Sogndal, Luster, Lærdal, Årdal og Aurland. Dei har som mål å bygge reiselivet på naturverdiane, kulturhistoria og menneska som bur her sine premiss. Kva plass har lokal mat og drikke i deira arbeid?

Program

19.00: Sogn næring ynskjer velkommen

19.10: Gabe Cook, The Ciderologist: Cider og gastronomi. Kva potensiale ser han i cider og lokalmat frå Sogn?

19.30: Panelsamtale - Korleis kan vider og lokalmat løfte Sogn som reiselivsdestinasjon? Panelet er leia av ein representant frå Visit Sognefjord, og i sofaen sit Gabe Cook (The Ciderologist), Tuba Ardic (Ciderhuset), Endre Kleiveland (Sogn Frukt-og Ciderlaug).

Det blir rom for spørsmål og dialog frå tilhøyrarane.

20.00-22.00: Avrunding og pubkveld.

Det blir lagt opp til ein flytande dialog med moglegheit til å stille spørsmål etter kvart. Det blir servering fram til 22, og moglegheit til å kjøpe seg noko godt i glaset og snacks. Målet er å skape ein kreativ atmosfære der aktørar kan møtast og få inspirasjon og kanskje lære noko nytt av dei mange innovative aktørane som finst i og rundt Balestrand. Vi i Sogn Næring er sjølvsagt til stades og slår gjerne av ein prat med dei som måtte ynskje det.

Arrangementet er ope for alle! Velkommen!

Gabe Cook frå England held kurs for entusiastar og produsentar i Sogn.